Придобивки од складирањето во облак
Дури и ако ги преземете сите вистински чекори за да ги заштитите вашите компјутери од злонамерен софтвер и физичка кражба, сепак е можно некој решителен противник да го хакира вашиот компјутер или локалниот сервер на парламентот. Ним им е многу потешко да ја совладаат безбедносната одбрана на Гугл или на Мајкрософт, на пример. Добрите компании за складирање во облак имаат неспоредливи безбедносни ресурси и имаат силна деловна мотивација да обезбедат максимална безбедност за своите корисници. Накратко: една сигурна стратегија за складирање во облак ќе биде многу полесно да се спроведе и да се одржува безбедноста со текот на времето. Затоа, наместо да се обидувате да го идентификувате (и задржите) посветениот и висококвалификуван кадар за кибернетска безбедност потребен за заштита на локалните сервери во вашиот парламент, фокусирајте ја својата енергија на неколку поедноставни задачи. Тие вклучуваат избор на вистинската опција за складирање во облак за вашите потреби за приватност и локализација на податоците, спроведување добра безбедност на сметките, обука на вработените за правилно споделување (и несподелување) папки и документи (генерално, треба да поставите папки во вашиот диск за складирање во облак кои го ограничуваат пристапот само на кадарот на кој му е потребен пристап до одредени датотеки) и рутинска ревизија на вашиот систем за да се осигурите дека вработените и членовите не „споделуваат премногу“ датотеки (на пример, со вклучување на универзални врски за споделување датотеки кои треба да бидат ограничени само на неколку лица).
Складирањето на најголемиот дел од вашите информации во облак помага при низа вообичаени ризици. Дали нечиј компјутер бил оставен во ресторан или нечиј телефон во автобус? Дали вашето дете истурило чаша сок врз вашата тастатура поради што вашиот уред е нефункционален? Дали треба да ги одделите посебно податоците што ѝ припаѓаат на пратеничката од информациите што таа ги креира за парламентот? Дали вработен има злонамерен софтвер и треба да го избрише својот компјутер и да почне одново да работи на него? Ако повеќето документи и податоци се во облак, лесно е повторно да се направи синхронизација и да се почне одново да се работи на исчистен или на целосно нов компјутер. Исто така, ако злонамерен софтвер влезе во некој компјутер или ако некој крадец скенира тврд диск, нема што да украде ако на повеќето документи се пристапува преку веб-пребарувач.
Можеме ли, навистина, да му веруваме на складирањето во облак?
Накратко, нема никаква суштинска причина зошто не би му верувале на складирањето во облак. Како што веќе беше спомнато, повеќето големи даватели на услуги за складирање во облак имаат тимови од најдобрите светски инженери за безбедност кои секојдневно работат на заштита на нивните производи и нудат безбедносна поддршка за своите клиенти во поголем обем од она што повеќето мали ИТ сектори би можеле да го обезбедат. Меѓутоа, имајте предвид дека традиционалните услуги за складирање во облак обично изискуваат доделување пристап до чувствителни податоци на компанија-трета страна која ја обезбедува услугата. Имајќи го предвид тоа, секој поединечен парламент ќе има свои политички согледувања и законски барања (како што се барањата за локализација на податоците) кои треба да ги земе предвид кога ќе избира дали може да му верува и да користи одреден давател на услуги за складирање во облак.
Кој давател на услуги за складирање во облак треба да го избереме?
Ако вашиот парламент не мора да зема предвид никакви барања за локализација на податоците и нема проблем со тоа да сподели пристап до податоците со доверлива компанија-трета страна, двете најпопуларни опции за складирање во облак се Гугл воркспејс (порано познат како GSuite) и Мајкрософт 365. Ако вашиот парламент веќе користи Џимеил, би имало многу смисла да го регистрирате на Гугл воркспејс и да складирате податоци во Гугл драјв со неговите вградени апликации Гугл докс, шитс и слајдс за обработка на текст, табели и презентации. Слично на тоа, ако вашиот парламент се потпира на Ексел и Ворд, лесната опција е да се регистрирате на Мајкрософт 365, кој овозможува пристап до Аутлук за е-пошта и лиценцирани верзии на Ворд, Ексел, Пауерпоинт и Тимс.
Што ако треба да ги контролираме сопствените податоци или да ги почитуваме законите за локализација на податоци?
За многу парламенти, таквата едноставна опција, можеби, не е изводлива со оглед на барањата за локализација на податоците или специфичните очекувања кои изискуваат ексклузивна контрола на парламентот врз сопствените податоци. Добрата вест е дека неодамна давателите на услуги за безбедно складирање во облак креираа опции кои им овозможуваат на клиентите од претпријатијата или да ја изберат локацијата на нивните податоци (имајте предвид дека засега ова е главно ограничено на европските клиенти) или да ги контролираат нивните клучеви за шифрирање. Во практика тоа значи дека вашиот парламент има опции да ги контролира сопствените податоци, а, сепак, да има корист од инфраструктурата и безбедноста на складирањето во облак.
Ако вашиот парламент моментално користи или е заинтересиран за Гугл воркспејс за складирање и споделување податоци во облак, Гугл воведе функција која овозможува шифрирање на страната на клиентот за организации во Ентерпрајз плус (Enterprise Plus). Иако моментално е во фаза на тестирање и е достапна само за најскапите планови на Гугл воркспејс, оваа функција обезбедува опција за искористување на целосниот пакет функции за складирање и споделување податоци на Гугл драјв – и безбедносните функции вградени во нив – истовремено ограничувајќи ја способноста на Гугл за пристап до чувствителните или приватните информации на вашиот парламент. Со шифрирање на страната на клиентот, можете да изберете да интегрирате дополнителна услуга за управување со клучеви, како што е Virtru, и да им дозволите на корисниците да управуваат со сопствените клучеви за шифрирање без да му дадат пристап на Гугл. Таквата услуга бара од сите да внимаваат за да ги заштитат тие клучеви со цел правилно да го заштитат пристапот до кој било систем за управување со клучеви што ќе изберат да го интегрираат во Гугл воркспејс. Администраторите на сметките можат да дознаат повеќе за тоа како да овозможат шифрирање на страната на клиентот на страницата за поддршка на Гугл воркспејс.
Ако вашиот парламент моментално користи или е заинтересиран за Мајкрософт 365 за складирање и споделување податоци во облак, тој нуди малку посложена, но добро воспоставена опција за управување со вашите клучеви за шифрирање, позната како шифрирање со два клуча на Microsoft 365. Оваа безбедносна опција бара од Microsoft 365 E5, но ви овозможува и вам да ги контролирате сите чувствителни или приватни парламентарни податоци и да го ограничите пристапот дури и на самиот Мајкрософт.
Tresorit е уште една опција која е поедноставна за спроведување ако вашиот парламент е загрижен во однос на дозволувањето на трета страна да пристапи до вашите внатрешни информации. Tresorit обезбедува целосно, од крај до крај, шифрирање за складирање во облак и споделување датотеки и нуди низа опции за резидентност на податоците.
